不准泊牛???

2008年4月26日時晴時雨，今日係星期六，下午唔洗返工，而且啱啱中午先喺深圳返落黎，於是順路喺粉嶺落咗車，開始我今日四小時ge尋碑之旅。 話說之前我係網度搵維多利亞界石ge資料時，無意間搵到一張(不准繫牛石碑)ge相片同一句指示位置ge文字(安樂村路旁)，於是我就手握地圖兼鎖定區域，沿路上問咗超過二十個人有多，結果係冇一個人知道有依舊碑石，最終我都係靠自己，用上差唔多兩個小時先搵到個牛碑 (但後來係祟謙堂一位彭姓村民口中得知這個碑石的由來，話說那個年代，住在安樂村的多是一d軍閥惡霸，他們限時限刻及以收費的方式給予祟謙堂的村民出入該處，包括牛隻在內，但由於祟謙堂出聯和墟最近的就只有依條路，於是當年ge祟謙堂就同安樂村打官師，最終一定係祟謙堂贏咗啦，自此人同牛都可以自由出入，所以當時ge理民府就為此事而立依個1930年ge碑石，但後因太多牛ge關係，於1934年再立另一碑石)，至於信不信就由你啦。.

(1) 不准繫牛ge碑石。

灣仔的海軍界石

2008年4月25日天陰有微雨，灣仔係一個你我時常都會經過的地方，就等小弟同大家分享一吓我所知ge一d有趣事，
灣仔依個名係解小海灣ge意思，今日皇后大道東大王東西街ge洪聖廟在未填海前，灣仔時的海岸線亦都喺洪聖廟附近，1841年建築皇后大道前，海岸約在大道東附近，建造大道東時倒進海中的沙土成了新的土地，新的海岸稱為海旁東，即今日的莊士敦道，這就是香港最早的填海工程之一，到了1902年建造香港電車時，電車路即設在海旁東，灣仔海岸線歷年不停的隨著填海外移，而醫院山（現今律敦治醫院所在），是開埠後港島最早開發地區之一，律敦治醫院係一所擁有超過140年歷史的醫院，佢ge前身係一間海員及海軍醫院 (軍事醫院)，而在這個醫院山下，亦曾建有一個防空洞 (編號 62)，經過一輪走來走去之後，係依度只能搵到幾塊疑似海軍標記ge石刻同一d比人遺棄喺路邊ge石碇，不過我都好好彩，最終我都喺附近 (華仁書院ge山腳) 搵到兩塊昔日皇家海軍地界ge界石 (一塊健全，其餘一塊已被泥土覆蓋得只剩一半)，上面分別刻有編號，軍徽同1905ge年份。
 　　

(1) 被遺棄的一對石碇 - 據管理員陳述依對係
海軍醫院時代遺留下來。

50年代的美都

2008年4月20日天陰，遊閒的一日，於是乎走出去嘆返個high tea，目的地就係廟街ge美都餐室，先喺度同大家分享吓美都餐室ge歷史啦。 (美都餐室於1950年開業，直至今日仍保留1950年代的裝潢，見證著香港歷史，除地下外更有當年十分普遍的二樓雅座)。雖然個度係一間茶室，由於它的名氣大，所以價錢就同酒店差唔多，我地一坐低就叫咗其中兩樣最出名ge焗排骨飯同西多士，之後再加多兩個例湯 (南瓜排骨湯)，嘩~~~~好好味。

(1)

瘋人風雨尋界石

2008年4月19日大風大雨，今日我地輕鬆遊，尋找七塊維多利亞界石.........(港英政府於1903年正式刊登憲報，頒令界定維多利亞城的範圍，並在西環至現時跑馬地一帶，合共豎立了多塊界石，以標明維多利亞城的邊界範圍，這塊界石高九十八厘米，頂部呈錐形，並刻有「City Boundary 1903」字樣，但現只餘下六塊界石。)，雖然天文台掛緊三號波.......(浣熊)颱風，但係我同豬腸粉兩條壯丁堅守風雨不改ge習慣，一早係金鐘嘆返個大家樂早餐之後，準時9:00正出發，不過由於個天已經開始落住雨，而我地又要趕住中午13:00返落黎中環飲茶，再加上我地兩個都係較資料去搵個七條界石，所以為咗慳d時間，部份路段會選擇坐車。 我地先坐的士直到曉峰閣再步行到舊山頂道，過咗避雨亭就已看到我地今日要搵ge第一舊界石，跟住再由地利根德里步行轉梅道上接馬己仙峽道15號，另一舊界石遺址亦都搵到啦，但係上走途中，我地兩個把傘已經比d風吹爛咗，我地一路橕住把爛鬼遮一路再返過馬路經配水庫盡頭轉走山路，再下接寶雲道出司徒拔道，而另一舊界石大約座落喺寶雲道與司徒拔道路口相差約兩分鐘路程ge位置，一輪快步加拍攝之後，睇吓隻錶，已經係11:15啦，時間越來越緊，我地立即坐19號巴士落黃泥涌道聖保祿小學對面影埋今日第四條界石先趕去國金二期坐3 號專線小巴上克頓道，落車後上行約五百米就見多一塊界石啦，依個時候D雨越來越大，我地好快咁維有又走去坐的士直達薄扶林道睇埋個舊界石先再落返去西寧街公園影埋今日最後ge一舊，之後就行返去巴士總站坐巴士出去中環飲茶，當然我地緊係唔會唔記得影埋東華痘局遺址個碑石啦，坐低嘆茶ge時候已經係14:00啦。

  

(1) 維多利亞城界石 - 舊山頂道近地利根德里。 

分流燈塔

2008年4月13日天陰有微風，今日跟社長出海去分流，其實依個地方已經去過無數次，對上一次係舊年12月ge事 (分流之行)，可惜今日全程水漲，始終都過唔到雞山，不過今次最主要ge目的係要補返燈塔同普濟禪院遺址d相，至於雞山唯有再擇吉日去多次啦。    

(1) 分流53號燈塔。

霧鎖夜香江

2008年4月11日天陰有霧，今天一早起來忽然心血來潮，於是攞埋支腳架返工，等收工之後走出去尖沙咀碼頭影吓夜景，不過今日真係好大霧，就連國金二期個頂都見佢唔到，不過有霧ge香港夜景又有佢另一種迷人之處。 

(1) 鋪滿黃金 ge 鐘樓。

有機開荒牛

2008年4月6日天晴，今日並唔係上山下海，而係有新新攪作，事源係我有一位朋友最近準備開一個有機農莊，礙於人力有限，所以我就邀請咗各方人士為我這位朋友做次開荒牛，好在d朋友很比面，我地一行19人相約10:00喺荔景地鐡站集合 (一個人都冇遲到)，然後再坐小巴去到農莊門口，其餘仲有部份朋友就自行駕車而來，經過我地ge主持人一輪介紹後，我地就開始分工合作，女生們就除雜草，男生們就鏟泥砌磚，經過數小時ge開荒之後，由於較早前運黎ge磚已經用晒，而其他設施ge材料亦未齊全，所以今日ge開荒運動就只能到此為止，其餘ge就留返下次先再開荒，最後就由莊主帶我地繞山行咗約一個鐘經青山道落美孚散隊。

(1) 一眾開荒牛~~~~~小心過馬路呀 !