坪洲新天地

2008年6月29日西南風2級，上午有雷暴，早上我地一行4人乘坐9:30的慢船入坪洲，經過45分鐘ge船程，我地一到步就先行走去睇睇一個已有173年歷史ge奉禁封船碑，之後就再走去大利洲逛咗一圈，但由於太大雨關係，我地決定走落橋底避一避，點知喺落橋底ge最後一腳竟然冼咗我一野，好彩我多年苦練ge(彈力屁股氣功)冇白練，只係斷咗個傘頭，等依場大雨走咗之後，我地就繼續行程，一輪真假石景睇完之後，就返到去碼頭飲午茶嘆點心，跟住再上走坪洲最高點.......手指山(98m)，點知衰野一鑊接一鑊，正當企係標高柱影相ge時候，特然之間右手手指比野咬咗一吓，最初以為係蜜蜂，細看之下原來係~~~~蜈蚣，好彩佢只係條bb蜈蚣，不過都勁痛勁痺，如果佢再大條d，我睇我下一個景點一定係去醫院，小休過後，我地落到崖邊一個觀光亭，豬腸粉同志老師就落咗去玩石，我本來都想落去玩一玩，但我又怕d血氣過行會好似d武合劇d高手咁.......毒氣攻心 (即死)，所以我同老點就喺個亭度等佢地，最後輕輕鬆鬆的回走碼頭，乘坐17:00ge大船返出香港。 

(1) 

第一條牛孖筋

2008年6月25日，早兩日買咗d牛孖筋返屋企，今晚終於有時間炆啦，一放工返到黎，立即動手切切洗洗，因為d牛孖筋稔住好多小毛毛，所以一定要洗得好乾淨先可以再加煮煮，經過好幾次開火 / 熄火 / 焗完再焗之後，終於大功告成，試過味之後..........唔錯唔錯，d牛孖根好淋又唔韌，而且冇晒d牛蘇味，估唔到第一次炆牛孖筋就哈哈哈...........成功，下一次我ge目標就係..................未諗到。  

(1) 洗淨之後等出水。

8號荷葉雞

2008年6月24日天陰，今年第一個颱風風神喺今日黎香港暢遊，晚上22:45天文台已經掛咗8號風球，雖然今日ge天氣唔係咁好，但我喺收工ge時候去咗街市走一轉，目的就係為咗依個餸................荷葉雞。

(1) 雞呀雞呀......你好快就會變身ga啦 !

大癩痢吹喇叭

2008年6月22日天晴吹西南微風，依然有依個酷熱天氣警告，今日跟社長出隊暢遊西貢牛尾海大癩痢島，大癩痢島係我第一次登陸，一船人先穿遊峭壁洲ge沙塘口洞，然後再放低一班游水睇珊瑚ge團友喺白腊同甕缸灣之後，終於可以到我地落船啦，不過依個時候已經喺中午12:00啦，一上到大癩痢，社長就捨易取難，鏟草而上，一輪落石塞人之後，到我這個行最尾的人上ge時候，上攀作借力d草根冇晒、腳位d石頭冇晒，結果要自己開小抄爬上去，上上落落一輪之後，我只係夠時間玩依個落路坡，跟住又要趕小艇過隔離個響岩睇喇叭溝，左望望右望望，全日行唔夠兩個半鐘，又要上返大船返去白腊接返之前d團友，今日真係行得小......睇得小，經過今日超輕鬆遊之後，回程就約埋長江同一眾開心之家一齊落觀塘食返餐日本野 。    

(1)

嶼西新貌

2008年6月21日天晴，今日吹西南微風再加酷熱天氣警告，兩個字形容.....好曬，一早入東涌食咗個KFC早餐之後，準時10:00am 正齊人出發，我地一行六人ge頭盤就係東涌小炮台，一小時ge快速搜影後，我地就坐巴士上寶蓮寺。

(1) 很懷念的藍天白雲。

久違了的清澈維港

2008年6月20日天晴吹2級西南風，落咗兩個星期雨之後，依兩日都開始放晴啦，今早一起身，見到個天咁清，於是臨出門口就拎埋支腳架走，希望收工ge時候都係咁好天，咁又可以走去尖沙咀影返次清清楚楚ge幻彩詠香江，當然.................個天都冇令我失望。

(1) 七點幾啦................個天仲幾清幾靚。