苦等4年的長岩險岸

2008年10月26日天晴，今日比天文台搵咗笨，又話多雲，點知曬到成隻野咁，真係唔方唔多暈呀，講返今日ge行程，等咗4年...............終於可以一攀娥眉洲ge長岩險岸啦，我地先喺木筏頭搶灘登陸，沿途經過一兩個險位之後，就喺鶴咀環大休，食飽後，我地又要向長岩出發，先黎再走幾個險位，好快............等咗4年ge長岩終於可一嘗走走啦。

 

(1)

久違了的大頭洲

2008年10月18日天晴，今日個天真係好正，我地只有三丁友，由老師帶隊，目的地就係一個小小的大頭洲，雖則依度我曾經踏足過無數次，卻原來一張相都冇影過，其實這個地方對我黎講係非常之有情意結，中學階段差不多每個星期六都會同一班朋友仔入黎吹吓風...........睇吓浪，不過依家所有ge片段都只能回味，都係講返今日ge行程先，一個唔係好大ge島，竟然石景多多，我地左影右影都仲未影晒，不過已經用咗成3個鐘有多，於是大家都決定返去石澳食d野，留返下次先再玩過。

(1) 石澳石灘.........很多很多的中學回憶。

魔鬼的炮台

2008年10月7日天晴，今日係重陽節，所以我都登吓高應吓節，中午11:00，我地一行三人先彩虹坐地鐡出發，到油塘之後就開始步行上山，沿途見到唔小孝子賢孫，而我就選擇咗一條比較舒服的山徑經高俊苑上走衛奕信徑到魔鬼山(日軍佔領後被易名炮台山)，貪玩ge我地就沿途見乜玩乜，原本只需要行個多小時ge路程，我地竟然玩咗成5個幾鐘，仲要係未玩晒，睇黎我地都係要再黎多次先可以.................哈哈哈哈哈。

(1) 重陽節就係重陽節。

偷闖禁區望神洲

2008年10月1日天晴有風，今日跟社長走洲頭頂，我地先到曾經是熱門旅遊景點ge落馬洲觀景台一望我國神洲大地，跟住就回走今日ge主菜.........洲頭頂，本來一心今日可輕輕鬆鬆的走返轉，點知.............先黎在村內左穿右插，終於喺一面又斜又勁多碎石ge山坡自行開路直闖山脊，功力唔夠個d行友就要手腳並用咁爬上去，好快我地已經到咗洲頭頂，小休過後，大隊就再次攀山越嶺，穿越禁區界線的走多咗兩個山頭到達馬草壟。

 

(1) 起步啦........

十一國慶煙花耀香江

2008年10月1日國慶節，今年係中華人民共和國慶祝59週年，維港依舊以放煙花黎與民同樂，不過因為今日行完山，所以都係決定喺屋企睇就算啦...........，雖然係遠d，不過都幾唔錯ga。

(1)

水口摸蜆

2008年9月15日天晴，今日特登入去東涌食返過lunch，跟住中午13:00會埋阿美佢地成堆人一齊喺東涌坐車入水口，因為阿美話帶我地去摸蜆，其實我從來都未玩過摸蜆ga，所以覺得非常之開心，不過入到去先知原來已經有好多人喺度摸緊，原本我地有一個大把用黎掘蜆，但當我試玩過之後，我知自己已經唔再係一個後生仔............條腰同個膊頭即刻散晒，於是我都係用返d細件頭工具，經過3個鐘ge努力之後................哈哈哈哈(睇相啦) 。

(1) 水退後ge水口.........好大ga。

八月十五的月光

2008年9月14日.......農曆八月十五，今日就係中秋節，人月兩團圓.....................

大磡長洲追火龍

2008年9月13日天晴，繼上個星期(大磡三寶)之後，今早9:00我地一行4人再次搜查大磡村，由於上星期玩咗單人大戰四狗ge遊戲 ，所以今日大家都自備咗打狗捧以防萬一，我地以極快ge動作閃咗入去鐡網重重ge大磡村遺址裡面，好快就已經搵到我上星期仲未搵ge野.............機槍堡，經過一輪深入詳細ge偵查之後，我地就好滿足咁立刻撤離現場，走去坐車趕住乘坐11:45ge渡輪入長洲 ，會合埋老點一齊去飲茶，跟住就再去尋找之前仲未搵到個2舊長洲界石(長洲尋界石)，由於今次有備再來，No.6 的界石好快已經搵到，於是我地就立刻去搵埋最後一舊No.6ge界石，由於沿路兩邊都係一d已起ge墳地，所以我地都行得好小心，萬一跌到就真係大吉利是囉(個坑一定夠長)，經過一段密林之後，我地依然仲未搵到，但由於個天真係好熱，我地決定放棄搜尋............下次再黎過，不過No.3個舊都算叫做搵到個入口啦，下次應該一定可以搵埋最後個一舊界石，之後我地就去咗老點居ge長洲分陀沖返個涼，休息一陣先出去食晚飯，食完飯我地仲夠時間行吓沙灘迎吓月，之後先趕出去大坑睇舞火龍........(趕唔切就變咗睇.......冇火龍)，不過最終經豬腸粉ge引路下，我地都趕得切睇到最後個半個鐘，所以今日真係行程豐富，仲有火龍迎月。

(1) 果然鐡網重重。

小鴉洲風雲

2008年9月7日天晴，經過兩個鐘ge船程，終於黎到今日ge頭盤，就係位於大鴉洲對出的一個衛星小島........圓崗洲，登岸後，第一件事就係剪林開路，因為依度有一個貫穿小島兩邊的一個海蝕洞........通心洞，做過熱身之後，大隊就直航到達小鴉洲，今日終於可以一遊風雲海岸啦，黎依度我已經等咗四年啦~~~~~，點知最唔好ge野終於又發生咗，我個膝頭d老朋友又黎探我，沿途d石舊舊都好似部車咁大件，又要爬又要穿石巷，結果好唔容易先走畢全程，真係想小d力都唔洗旨意可以行得完，正當最後攀落一舊大石時，竟然條褲食咗成10幾支露兜葉d刺，一輪急救後，就喺北灣個沙灘同大隊分開咗，唯有自行穿林過反去另一邊上船，點知今次老貓燒鬚，喺個林穿咗10幾分鐘，結果都係走返出黎北灣，最終都係要由文源大哥過黎點條明路比我，不過今日都影漏咗d石景，睇黎下次又有借口可以去多次。

(1) 青洲。

大磡三寶

2008年9月6日天陰有雨，大磡村.........一處已經不存在ge木屋區，但很多人都唔知原來依度有佢珍貴ge歷史遺跡喺度，不過依家ge大磡村，已經比d鐡絲網圍到實一實，而裡面d草同樹長到好似森林公園一樣，從外圍走了兩個圈，最終都比我搵到偷偷鑽咗入去ge途徑，但由於啱啱落咗場大雨，所以d路都非常之唔好行，正當我入到心臟地帶時........飛機庫，本來一心以為可以影返幾張靚相，誰不知相機都未拎出黎，結果換黎3隻惡狗ge招呼，牠們由對面山丘的草叢不斷惡叫，我唯有立即回頭退下火線，正所謂一人難敵四狗。

(1) 好難想像之前依度係一個木屋區。